![Uswa e Rasool e Akram [S.A.W]](/store/1047/Cover Logo.jpg)
تواضع
تو اضع : رسول کریم (صلی اللہ علیہ وسلم) نے فرمایا کہ اللہ تعالی نے مجھ کو وحی بھیجی ہے کہ تم تواضع یعنی فروتنی اختیار کرو کہ کوئی ایک دوسرے پر فخر نہ کرے اور کوئی کسی پر زیادتی نہ کرے۔ حضرت عمر فاروق رضی اللہ عنہ نے ایک دن بر سر منبر ارشاد فرمایا کہ لوگو! فروتنی اور خاکساری
اختیار کرو کیونکہ میں نے رسول الله (صلی اللہ علیہ وسلم) سے سنا ہے آپ فرماتے تھے جس نے اللہ کے لئے (یعنی اللہ کا حکم سمجھ کر اور اس کی رضا حاصل کرنے کے لئے ) خاکساری کا رویہ اختیار کیا اور بندگان خدا کے مقابلے میں اپنے آپ کو اونچا کرنے کی بجائے نیچا رکھنے کی کوشش کی ) تو اللہ تعالی اس کو بلند کرے گا، جس کا نتیجہ یہ ہو گا کہ وہ اپنے خیال اور اپنی نگاہ میں تو چھوٹا ہو گا لیکن عام اللہ کے بندوں کی نگاہوں میں اونچا ہوگا اور جو کوئی تکبر اور بڑائی کا رویہ اختیار کرے گا تو اللہ تعالیٰ اس کو نیچے گرادے گا جس کا نتیجہ یہ ہوگا کہ وہ عام لوگوں کی نگاہوں میں ذلیل و حقیر ہو جائے گا اگر چہ خود اپنے خیال میں بڑا ہو گا لیکن دوسروں کی نظر میں وہ کتوں اور خنزیروں سے بھی زیادہ ذلیل اور بے وقعت ہو جائے گا۔ (شعب الایمان، للبیہقی )